Die Perfekte Kleurpalet

Hierdie artikel is in afrikaans geskryf agv afrikaanse koerant publikasie.

Mens sou dink dit is so maklik soos om jou twee gunsteling kleure in skakerings saam te smelt en Ta-Da! Toe nie… Daar is immers ’n paar goedjies om in gedagte te hou met die beplanning van ’n kleurpalet.

Eerstens, jou ligging. Al het jy reeds jou voorkeur van kleur in gedagte, speel jou keuse van troulokaal ’n groot rol. Nie net die dekor en ondertone van die lokaal self nie, maar ook jou omgewing, natuurskoon, en spasie rondom jou viering. ’n Troue by die see maak eindelose opsies van blou, pers, en seegroen oop, gemeng met aardse seesand ondertone en spierwit. ’n Troue in die Kalahari vra weer vir bruin, rooi en oranjes. Plekke soos omskepte pakhuise of groot makititente is almal leë skyfies, wat beteken dat jy regtig so veel, of so min, van jou visie van kleure en styl kan uitvoer as wat jy goed dink. As jy reeds die perfekte plek gevind het, gebruik die spasie om jou te help met jou keuse van kleurskema. Op so ‘n manier werk jy nie teen ’n botsende kleurpalet nie en jou keuses verbeter die mooi van jou ligging.

Die tweede punt om in gedagte te hou is waar die troue plaasvind en die beskikbaarheid van dekor in jou keuse van kleure. Soms is dit moeilik om buitengewone kleure servette, tafeldoeke, stoeloortreksels, of dekor stukke in die hande te kry wat ook binne jou begroting pas (lees gerus ons artikel: ’n Groot dag op ’n klein begroting). Indien jou beskikbaarheid beperk is, en jy nie huiwer in jou keuse nie, kyk na DIY opsies. Bestel lap, hout of handwerk materiaal op die internet en waag om jou hande vuil te maak. Agterna kan jy nabye vriendine seën met ‘n tafeldoek en 10 bypassende servette ens.