‘n Wintersprokie verhaal

Hoekom ‘n winterbruid of bruidegom die slimste plan beet het…
Hierdie artikel is in afrikaans geskryf agv afrikaanse koerant publikasie.

“Ons gaan trou!” Die rippeleffek van daardie drie woorde van die bruidspaartjie veroorsaak onmiddelik ‘n gevoel van opwinding en ekstase tussen familie en vriende. Voordat jy met enige beplanning kan begin, is die keuse van jou troudatum die grootste taak. Elke seisoen het sy voordele en nadele en daarom moet die bruidspaar besluit watter seisoen vertel hulle unieke liefdesverhaal die beste. Lente en somer word beskou as die top seisoene in Suid Afrika om ‘n bruilof te hou.

Lente praat die taal van nuwe begin met ontluikende kleur, blomme en groenigheid. Die wingerde in die Noord-Kaap begin net-net bot, terwyl die warm somersdae vinnig nader kruip. Die somer waarborg natuurlik sonskyn en bring jou gaste reeds in ‘n feesvierbui met die jaar end somersvakansie net om die draai. Dan in ons herfseisoen word bome kaal en kleure verander in romantiese, diep skakerings van oranje, bruin en goud. Dit vorm ‘n prag pallet wat enige bruidsuitrusting, asook foto’s van die gevolg en familie, sal komplimenteer.

Verwys gerus terug na die artikel:
“A Vibrant Winter Festival – Upington – Northern Cape”

Vandag wil ons klem lê op die winter trouseisoen. Ons persoonlike gunsteling! Die koel briesie van winter bring ‘n ander tipe romanse wat van binne af warm maak. Wintertroues word al hoe meer gewild in ons eie streek en ons weet hoekom:

Die grootste voordeel wat ons natuurlik eerste aan dink is die temperatuur. Geen sweet, bedompigheid, of hare en grimering wat bederf nie.  Inteendeel, fyn kant moue of ‘n elegante bolero kan die perfekte afwerking wees.  Manne kan hul elegante onderbaadjies saam met hul baadjies dra om hul uitrustings pragtig af te rond.

Al word dit toenemend gewild, is wintertroues steeds in die minderheid en dit verseker dat jou troudatum uniek en uitgesonder is. Vriende en familie se skedules is nie oorvol die tyd van die jaar nie en om ‘n troulokaal te bespreek behoort maklik genoeg te wees.

Die beplanningsproses verseker minder druk omdat die meeste gebeure vanselfsprekend binnemuurs plaasvind. Dit verseker geen bekommernis oor wind, reën of ongure weer nie.

Met die uitvoer van jou begroting glimlag jy al die pad bank toe. Meeste lokale is goedkoper buite die populêre trouseisoen en jy mag selfs regkom met ‘n paar spesiale, wintertrou-aanbiedinge as gevolg van verskaffers wat hul stiller seisoen ‘n hupstoot wil gee.

Winterspyskaarte het die potensiaal om besonders te wees. Meeste gaste onthou die lekker eet en gesellige kuier.  Maak jou winterspyskaart uniek met ryk, troos opsies soos warm sop voorgereg, vleissnitte gekomplimenteer met die perfekte rooiwyn, pampoenkoekies met kaneelsuiker of karamelsous, en selfs ‘n warm sjokolade met gesmelte malvalekkers en koffiekroeg om mee af te sluit.

Winteretes bring geliefdes altyd nader aan mekaar. Daar is niks meer romanties as ‘n kaggelvuur wat in die agtergrond brand nie.  Verskaf ‘n gemaksarea met sagte vleeskombersies om te deel, en skep ‘n romantiese en knus atmosfeer met dowwe beligting of ‘n oorvloed van olielampies en kerse.

Die romanse van die winterseisoen beklemtoon intiemheid en nabyheid.  ‘n Soeke na warmte by die een wat jy liefhet en vertrou.  Die een met wie jy jou hele lewe wil deel. As jy ‘n troue in gedagte het wat uitstaan en onthou gaan word, en daarby ook die gemak van maklike beplanning wil geniet – dan is dìè seisoen die regte keuse vir jou.  Waag gerus, wees uniek en gryp die mooi wat die winter bied om jou dag in ‘n sprokie op te tower.  Gelukkige Beplanning!